POEMAS A XEITO DE ROSALÍA
Os escolares de Pontevedra súmanse á celebración do 150 aniversario da publicación de Cantares Gallegos creando pequenos poemas a partir da nosa rica tradición oral. Nesta ocasión, as coplas do Cancionero Musical de Galicia de Casto Sampedro foron o seu punto de partida.
Este meniño ten sono,
ten ganiñas de durmir,
ten un olliño cerrado
outro non o pode abrir.
Este neno, meu neniño,
bonitiño coma un sol,
que me pode espertare
nesta noite de calor.
Xa está moi durmidiño,
soña con lindos anxiños,
no seu pequeniño berce,
coa lúa do lugariño.
José Ramón Panadero Rey, Lara Alvite Costa
CEIP San Bieito de Lérez 5º
-o-
Vamos indo, vamos indo
para o servicio do Rey.
Os ricos quedan na terra,
eu como son pobre irei.
Eu son pobre e o serei,
e vós ricos o seredes,
hai pobo de maltratados
e hai pobo de “bos seres”.
Noa
CEIP San Bieito de Lérez 5º
-o-
Eu subín a un limoeiro
enriba durmín un sono,
éche tempo ben perdido
o falar con quen ten dono.
Non che vai valer a pena
coas nenas mocear,
se no seu corazón teñen
outro amor a lle falar.
Máis, amores deben ter,
as mozas de por alí,
poden ter moitos máis mozos
que eu quedo coas de aquí.
Iván García Rodríguez
CEP Marcos da Portela 5ºB
-o-
O pandeiro e mai-las cunchas,
María, miña María,
o pandeiro e mai-las cunchas
quitan a melancolía.
O pandeiro e mai-las cunchas
sérvenme para volver rir,
o pandeiro e mai-las cunchas
danme ganas de sorrir.
O pandeiro e mai-las cunchas,
bailo e bailo sen parar,
o pandeiro e mai-las cunchas,
fanme rir e non chorar.
Carla Buceta Villaverde
CEP Marcos da Portela 5ºA
-o-
Pasei pol-a túa porta,
pidín auga e non ma deches,
en pasando pol-a miña
farei coma ti fixeches.
Pechas a porta moi forte
eu marcho moi enfadado,
cando me pidas café
pechareiche de contado.
Este día foi moi malo,
non quero falar contigo.
Non me gusta este home,
xa non es o meu amigo.
Alba López
CEP Marcos da Portela 5ºB
-o-
Arde o mundo coa festa
na cimiña do lugar,
na casa da tía Ernesta
queda o gaiteiro a tocar.
Toca unha peza bonita
coa súa gaita queridiña,
a xente empeza a bailar
nesta festa divertida.
Eu estou co gaiteiriño
a tocar co meu tambor
unha bonita muiñeira
adicada ao meu amor.
E bailamos todos xuntos
ao son da súa gaitiña,
pandeiriños e palmadas
con Ernesta na cociña.
As mozas poñen o traxe
que a muiñeira van bailar.
Danse presa os mociños
porque a xente vai chegar.
A xente empeza a bailar
e as nenas a cantar,
o gaiteiro anima a festa,
despois da xente xantar
Os paxariños pían, pían,
enriba do piñeiral,
alegría en todo o mundo
que non paran de bailar.
Cantan cantigas galegas,
muiñeiras e alalás,
acompañan as cantigas
co son do chascarraschás.
Alba Justo Juvino , Iván Fraguas ,
CEP Marcos da Portela 5º
Raquel Saburido, Gemma Fraga Fariña
CEIP San Bieito de Lérez 5º
-o-
A raíz d’un toxo seco
éche mala d’arrincar,
fai com’os amores vellos
que son malos d’olvidar.
Cada vez que pecho os ollos
penso no primeiro amor
e cada vez que miro ao ceo
acórdome da súa calor.
As estrelas brillan na noite
e a lúa co luar,
teño tantos amores vellos
que os teño que olvidar.
Natalia Fiuza Loureiro
CEP Marcos da Portela 5ºA
-o-
Paxaro que vas voando,
as prumas che van caíndo,
se souperas, paxariño,
de ti o que van dicindo.
Din que estás moi namorado
dunha moza ben feitiña
que cando ela bota a rir
o teu corazón palpita.
Andrea Galmán García
CEP Marcos da Portela 5ºB
-o-
Para cantar veño eu
para bailar meu irmán
para tocar o pandeiro
viva quen o ten na man.
Que non falte o gaiteiro
nesta festa do lugar.
Tamén falta o pianista
que parece non chegar.
Marta Gil
CEP Marcos da Portela 5ºB
-o-
Pasei pola túa porta,
pedín auga non ma deches,
en pasando pola miña
farei coma ti fixeches.
Cando ti me pidas algo
eu deixareite na rúa,
ti a min non me axudaches
e non vas saír coa túa.
Sandra Cacabelos Acuña
CEIP San Bieito de Lérez 5º
-o-
A nena do lazo branco
ten a cara de serafín,
cando entra pol-a iglesia
todo-los santos lle rin.
Tamén é boa persoa,
porque se leva ben coa xente,
e respecta ata a Deus
e aos santos que lle menten.
Iago García Palacios
CEP Marcos da Portela 5ºB